શહેર ટ્રાફિક પોલીસ દ્વારા રોગ સાઈડમાં વાહન ચલાવતા વાહનચાલકોને પકડી તેમની સામે ગુનો નોંધવાની સ્પેશિયલ ડ્રાઈવનું આયોજન કર્યું હતું. આ ડ્રાઈવ અંતર્ગત પોલીસે તા.29 સુધીમાં આશરે બે હજારથી વધુ લોકોને પકડીને કેસ કર્યા છે. આ તમામ વાહનચાલકો સામે આઈપીસીની કલમ 279 અને મોટર વેહિકલ એક્ટની કલમ 184 હેઠળ ગુનો નોંધ્યો હતો. તેથી આ તમામ વાહનચાલકોને જામીન લેવા માટે પોલીસ સ્ટેશન જવુ પડ્યું હતું. જો કે શહેરભરની પોલીસે કરેલી આ કામગીરીમાં ટ્રાફિક પશ્ચિમ પોલીસે સૌથી વધુ કેસ કર્યા હતા. આંકડાકીય માહિતી મુજબ ટ્રાફિક પૂર્વ અને સ્થાનિક પોલીસની આ કામગીરીમાં ઉદાસીનતા જણાઇ આવી હતી.

પોલીસસ્ટેશન દ્વારા કરાયેલી કામગીરીમાં સૌથી વધુ કેસ માત્ર ઝોન-5ની ગોમતીપુર, બાપુનગર, રખિયાલ, અમરાઇવાડી, ખોખરા, ઓઢવ, નિકોલ અને રામોલ પોલીસે જ્યારે ઝોન-6ની ઇસનપુર, મણીનગર, વટવા, વટવા જીઆઇડીસી, દાણીલીમડા, કાગડાપીઠ અને નારોલ પોલીસે કર્યા હતા. ત્યારે પોલીસ અધિકારીઓનું કહેવુ છે કે આગામી દિવસોમાં પણ આ કામગીરી યથાવત રખાશે. ટ્રાફિક પૂર્વએ 641, ટ્રાફિક પશ્ચિમએ 719 કેસ કર્યા છે. જો ઝોન પ્રમાણે વાત કરવામાં આવે તો ઝોન-1 દ્વારા 18, ઝોન-2દ્વારા 22, ઝોન-3દ્વારા 14, ઝોન-4દ્વારા 33,ઝોન-5દ્વારા 192,ઝોન-6દ્વારા 155,ઝોન-7 દ્વારા 13 કેસ કરવામાં આવ્યા છે.