ગીતામંદિર બસ સ્ટેન્ડમાં ફરી એકવાર અસામાજીક તત્વોનો આતંક સામે આવ્યો છે. જેમાં ગીતામંદિર બસ સ્ટેન્ડ પાસે જમવાની કેન્ટીનમાં બે શખ્સો આવીને વેપારીને હું અહિયાનો દાદા છુ ઘણીવાર જેલ જઇ આવ્યો છું પોલીસ મારાથી ડરે છે કહીને છરી બતાવીને ધાકધમકી આપીને રૂ.1500ની લૂંટ કરી ફરાર થઈ ગયા હતા. આ અંગે કેન્ટીનના માલિકે શખ્સ સામે કાગડાપીઠ પોલીસ સ્ટેશનમાં ફરિયાદ નોધાવી છે. તેમજ અગાઉ પણ આ શખ્સ સામે અનેક ગુનાઓ નોધાઇ ચૂક્યા છે. અને વેપારીઓને ધમકાવીને રૂપિયા લઇને ફરાર થઇ જતો હતો.

કુબરેનગરમાં રહેતા 50 વર્ષીય હિરાલાલ સોમૈયા ગીતામંદિર બસ સ્ટેન્ડ પાસે જમવાની કેન્ટીન ધરાવે છે. ગત 9 જુલાઇએ તેઓ બહાર ગામ ગયા હતા ત્યારે કેન્ટીનમાં કામ કરતા છોકરા લહેરુસિંગ અને રજની કેન્ટીનમાં હાજર હતા. ત્યારે રાત્રીના સમયે લહેરુસિંગનો ફોન આવ્યો હતો અને જણાવ્યું હતુ કે, ભાવેશ ઉર્ફે મંગો તેના બીજા એક મિત્ર સાથે કેન્ટીનમાં આવ્યો હતો. અચાનક છરી બતાવીને પૈસા આપ નહિતો જાનથી મારી નાખીશ તેવી ધમકી આપીને ધક્કો મારીને જમીને પાડી દીધો હતો. ત્યારબાદ જો પૈસા નહીં આપે તો તું ગયો, હું ઘણી વખત જેલમાં જઈને આવ્યો છુ, હું કોઈનાથી ડરતો નથી, પોલીસ મારાથી ડરે છે તેવી ધમકી આપીને કાઉન્ટરના ડ્રોવરમાં મુકેલા રૂ.1500 ની લૂંટ કરીને ફરાર થઈ ગયો હતો. આ અંગે હિરાલાલે કાગડાપીઠ પોલીસ સ્ટેશનમાં ભાવેશ સામે ફરિયાદ નોધાવી છે.