હાથીજણમાં રહેતા યુવકે પુત્રીની સ્કુલની ફી ભરવા મિત્ર પાસેથી રૂ. 10 હજાર વ્યાજે લીધા હતા. જ્યારે રૂ. 8 હજાર ચૂકવી દીધા હોવા છતા પણ મિત્રે રૂપિયાની પઠાણી ઉઘરાણી કરીને યુવકને લાકડાના ધોકાથી ફટકાર્યો હતો. જેમાં યુવક મિત્રને રોજનું રૂ. 100 વ્યાજ પણ આપતો હતો. આ અંગે યુવકે વ્યાજખોર મિત્ર સામે વિવેકાનંદનગર પોલીસ સ્ટેશનમાં ફરિયાદ નોધાવી છે.

હાથીજણમાં રહેતા દેવેન્દ્રભાઇ રાઠોડ દરજીકામ કરીને પરિવારનું ગુજરાન ચલાવે છે. જેમાં એક મહિના પહેલા તેમની પુત્રીની સ્કુલની ફી ભરવા તેમની પાસે રૂપિયાની સગવડ ન હોવાથી તેમને મિત્ર મયંક રાવલને વાત કરતા તેની પાસેથી રૂ. 10 હજાર વ્યાજે લીધા હતા. જેમાં રોજના રૂ. 100 વ્યાજપેટે આપવાનું નક્કી કર્યુ હતુ. જે બાદ મયંકના કહેવાથી તેને તેના મિત્રને રૂ. 5 હજાર પણ આપ્યા હતા. આમ કુલ રૂ. 8 હજાર ચૂકવી દીધા હતા. ગત 10 જુલાઇએ દેવેન્દ્ર બડોદરા ગામ પાસે મિત્ર સાથે બેઠો હતો તે સમયે મયંક રિક્ષા લઇને આવ્યો હતો. અને રૂપિયાની ઉઘરાણી કરતા દેવેન્દ્રે તેને થોડા દિવસમાં રૂ. 5 હજાર આપી દેવાનું જણાવ્યુ હતુ. તેમ છતા મયંકે રિક્ષામાંથી લાકડાનો ધોકો કાઢીને દેવેન્દ્રને ફટકાર્યો હતો. બૂમાબૂમ થતા આસપાસના લોકો આવી જતા મયંક ત્યાંથી રિક્ષા લઇને નાસી ગયો હતો. તેમજ ઇજાગ્રસ્ત દેવેન્દ્રને સારવારઅર્થે હોસ્પિટલમાં લઇ જવામાં આવ્યો હતો. આ અંગે દેવેન્દ્રે મયંક સામે વિવેકાનંદનગર પોલીસ સ્ટેશનમાં ફરિયાદ નોધાવી છે.