રોજના રૂ.2800ના ભાડેથી બે ગઠિયા 15 હજાર એડવાન્સ આપીને 10 દિવસ માટે ગાડી લઈ ગયા હતા. ત્યારબાદ આશરે અઢી મહિના સુધી ગાડી પાછી નહીં આપી ગલ્લાતલ્લા કરતા હોવાથી આખરે ગાડીના માલિકે સોલા હાઈકોર્ટ પોલીસ સ્ટેશનમાં ફરિયાદ નોંધાવી હતી.

           અમદાવાદના ગોતામાં રહેતા કિશોર ભોજવાણી (ઉં.52) પ્રાઇવેટ વર્ધીના ભાડામાં ગાડી ફેરવે છે. 4 જુલાઈએ સવારે 10 વાગ્યે કિશોરભાઈ પર અજાણ્યા નંબરથી ફોન આવ્યો હતો, જેમાં સામે વાળાએ પોતાનું નામ હિતેશ પ્રજાપતિ અને ગાંધીધામથી બોલતા હોવાનું કહ્યું હતું. આટલું જ નહીં ભાડે ફરતી ગાડીની એપ્લિકેશનમાંથી કિશોરભાઈનો નંબર મળ્યો હોવાની વાત કરી હતી. ત્યાર બાદ 10 દિવસ માટે ભાડેથી ગાડી જોઈએ છે તેવી વાત કરીને કિશોરભાઈના મિત્ર મનીષ જૈને રેફરન્સ આપ્યો હોવાનું કહ્યું હતું. આથી કિશોરભાઈએ મનીષ જૈન સાથે વાત કરતા તેણે કહ્યું હતું કે, વાંધો નહીં તમે હિતેશ પ્રજાપતિને ગાડી આપો. આમ કહેતાં કિશોરભાઈએ ગાડીના ફોટો પાડીને હિતેશને મોકલ્યા હતા અને રોજના રૂ.2800ના ભાડાથી ગાડી આપવાનું નક્કી કર્યું હતું. તે જ દિવસે સાંજે હિતેશ પ્રજાપતિએ ફોન પર વાત કરીને ગાડી પકવાન ચાર રસ્તા પર જાફરાબાદી ઈમરાન જુસબ (માંડવી)ને આપી દેવા કહ્યું હતું. આથી હિતેશ પ્રજાપતિએ તેમના ખાતામાં 15 હજાર ટ્રાન્સફર કરી દીધા હતા અને ઈમરાન ગાડી લઈ ગયો હતો. 10 દિવસ બાદ કિશોરભાઈએ ગાડી પાછી લેવા ફોન કરતા હિતેશે ગલ્લાતલ્લા કર્યા હતા. આથી આ અંગે કિશોરભાઈ ભોજવાણીએ હિતેશ પ્રજાપતિ અને ઈમરાન જાફરાબાદી જુસબ વિરુદ્ધ ફરિયાદ નોંધાવી હતી.